30 nýggjar íbúðir byggjast í Fuglafirði

Mynd: fuglafjordur.fo

30 nýggjar íbúðir byggjast í Fuglafirði

2017-12-23 10:23 Author image
Leif Láadal

Ein ætlan um at byggja í minsta lagi 30 nýggjar íbúðir í Fuglafirði er nú komin so mikið langt, at farast kann undir hesa verkætlan fyrst í nýggja árinum. Tað eru Fuglafjarðar kommuna, Bústaðir, TN Bygging og Teknistovan í Gøtu, sum í felag hava arbeitt við hesi stóru verkætlan.

Gongst sum ætlað, so kunnu fólk flyta inn í fyrstu nýggju íbúðirnar longu í 2019, og eftir ætlan skulu allar íbúðirnar standa lidnar í 2020.

Talan er um íbúðarbygging Úti á Land í Fuglafirði.

Staðsetingin er gjørd í einum sera náttúruvøkrum umhvørvi millum núverandi koyribreyt á Toftanesvegi  og sjóvarmálan, har byggingin verður gjørd í tveimum byggistigum við í minsta lagi 15 búeindum í hvørjari eind.

Íbúðirnar verða 60 til 90 fermetrar til støddar.

Talan er um leiguíbúðir, men møguleiki er eisini fyri, at partur av byggingini verða eigara- og lutaíbúðir.

Fuglafjarðar kommuna hevur sett peningin av til byggibúningina í fíggjarætlanini fyri 2018 og verður farið undir hetta arbeiði beinanvegin, soleiðis at klárt er at fara undir sjálva byggingina av íbúðunum móti sumri.

placeholder

Meira langlesnaður