Fjúrtan verkætlanir í Listaleypinum hesaferð

Gunnvá Zachariasen. Mynd: Skúlablaðið

Fjúrtan verkætlanir í Listaleypinum hesaferð

2017-09-24 11:45 Author image
Leif Láadal

Listaleypurin rúmar tilsamans 14 verkætlanum skúlaárið 17/18. Av teimum eru tvær økislistafólk, tey rópa, við listafólkum úr Føroyum, Danmark, Svøríki, Finnlandi, Grønlandi, Belgia, Bretlandi, Kanada og Australia.

Listirnar fevna víða, frá tónleikaframførslum til interaktivar sjónleikir, bussframførslu, kórlæru, til filmsverksmiðju og myndaverksmiðju og eksperimentarandi framførslur við rættiliga alternativum ljóðførum umframt rokkar og karðar og onnur amboð úr fornari føroyskari tíð. Hetta eru alt listagreinir, ið fevna um forskúla og allar flokkar í fólkaskúlanum, skrivar skúlablaðið.

Fyrsta listagreinin er sjónleikurin Rúmdarferðin hjá Chappari, sum verður spældur í bussi á skúlaøkjum frá 23. til 27. oktober. Seinasta listagreinin er Sagnir og ævintýr, sum er sjónleikur og tónleikur. Sagnirnar og ævintýrini ganga frá 16. apríl til 4. mai næsta vár.

Tiltakið Økislistafólk, ið er eitt slag av House Artists-prosjekti – húsalistafólk – gevur børnum og ungum innlit í og royndir við at arbeiða við list saman við einum professionellum, virknum listafólki. Hetta skúlaárið eru evnini so eksotisk og víðfevnd sum grønlendskur maskudansur og interaktiv sansaleiklist.

Undangongukvinnan, teaturpedagogurin Hedvig Westerlund-Kapnas smíðaði Listaleypin í 2008, og í leypinum er hvørt ár møguleiki hjá næmingum og lærarum í forskúla og fólkaskúla at uppliva eitt fjølbroytt úrval av dygdargóðari yrkislist.

Skúlarnir gjalda einki fyri Listaleypin. Kommunurnar, Mentamálaráðið og Norðurlandahúsið bera allan kostnaðin.

Í løtuni er Gunnvá Zachariasen, yrkisleikari, samskipari og verkætlanarleiðari hjá Listaleypinum, ið hevur teldupostadressuna listaleypurin@listaleypurin.fo.


Kelda og lesið meira HER

 

 

 

placeholder

Meira langlesnaður