Føroya vakrasta hálvmaraton næstan fult teknað

2016-08-29 08:28 Author image
Dimma

Hetta er á triðja sinni at skipað verður fyri hálvmaraton í Vágum. Luttakaratalið hini árini hevur ligið um 86 rennarar.

Nú ein vika er eftir, til starturin verður skotin ígongd í Gásadali, hava higartil 247 luttakarar teknað seg til at renna og ganga úr Gásadali til Sandavágs, 114 rennarar og 133 sum fara at ganga. Fyrireikarnir hava avgjørt at steðga fyri tilmelding, tá ið 300 hava teknað seg.


Stu
ðla krabbameinsfelagnum

Tað nýggja við Føroya vakrasta hálvmaraton í ár er, at skipað verður somuleiðis fyri gangi-hálvmaraton har ein partur av luttøkugjaldinum fer til Krabbameinsfelagið. Tað gleðir fyrireikarnar, at so nógv hava teknað seg til gangi-hálvmaraton og harvið stuðlað arbeiðnum hjá Krabbameinsfelagnum.

Luttakararnir til hálvmaraton møta kl. 9.30 við skúlan á Giljanesi, har startnummur verða útflýggjað. Møguligt verður hjá luttakarunum at skifta og lata skiftiklæðir inn, til at heinta eftir renningina, har møguleiki somuleiðis verður at fara undir brús. Klokkan 10.15 koyrir bussur av Giljanesi til Gásadals, og starturin er kl. 11. Fyri hvørjar 5 km verður ein vatnpostur.

Runnið verður eftir landavegnum úr Gásadali, omanfyri Bø til Sørvágs, síðan eftir gamla vegnum úr Sørvági, fram við terminalinum hjá Vága floghavn, eftir gamla vegnum til Vatnsoyrar og fram við Vatninum, gjøgnum Miðvág og komið verður á mál við kirkjuna í Sandavági. Tey sum ætla sær at ganga fara sama veg, men tá komið er til Vatnsoyrar verður farið niðan eftir Vatnsdalsbrekku og eftir Vørðunum til Miðvágs og koma á mál við kirkjuna í Sandavági.

 

Fólkaheilsurenning

Tað hevur týdning at røra seg, men tað eru ikki øll sum hava mót uppá at renna ella ganga eitt hálvt maraton. Tí skipar Ítróttarfelagið Frælsi saman við kommununum í Vágum og Fólkaheilsuráðnum fyri heilsurenning. Runnið ella gingið verður frá flogvøllinum til FK í Miðvági, hesin teinur er góðar 6 km. Tað er møguligt at tekna seg á heimasíðuni renn.fo ella á staðnum. Startnummur kunnu heintast á flogvøllinum frá kl. 11, fari verður avstað kl. 11.30.

Takkað veri høvuðsstuðlunum Hiddenfjord og FAE, umframt stuðulin frá FK í Miðvági, EUR Express, MBM og Føroya Bjór, og ikki minst øllum hjálparfólkunum og kommununum í Vágum, letur tað seg gera at skipa fyri hesum stóra tiltaki.

Fyriskiparnir vóna at síggja nógv fólk fram við vegnum at stuðla teimum sum luttaka.

placeholder

Meira langlesnaður