Manchester United Fjepparafelag Føroyar hevur fingið flúgvandi byrjan. Eftir stovnandi aðalfundin í Rex í Havn 15. desember kundu fjeppararnir fegnast um 1-0 sigur móti Liverpool á Anfield
Í tíðindaskrivi boðar føroyska fjepparafelagið hjá Manchester United frá, at nevndin í felagnum nú hevur skipað seg við Hera Simonsen sum formanni.
Fyri jól varð eitt føroyskt fjepparafelag fyri Manchester United skipað í Føroyum. Um vikuskiftið skipaði nevndin seg soleiðis:
Formaður: Heri Simonsen Næstformaður: Birnir Hauksson Kassameistari: Jóannes Egholm. Skrivari: Jón Brian Hvidtfeldt Nevndarlimur: Jan Poulsen Tiltakslimur: Leivur Langgaard
Felagið hevur eisini tvær undirvendir, eina ferðanevnd og eina heimasíðunevnd. Almenna navnið á felagnum er Manchester United Football Club’s Supporters Club Faroe Islands Branch, á føroyskum Manchester United Fjepparafelag Føroyar, stytt MUFF.
Felagið hevur higartil skipað fyri tveimum, almennum tiltøkum. Einum fyrireikandi fundi fyri at meta um áhugan fyri felagnum, og einum stovnandi aðalfundi, ið varð hildin á Rex sunnudagin 15. desember. Higartil hava umleið 200 fólk teknað seg sum lim í MUFF. Limagjaldið er 250 krónur um árið.
Fjepparafelagið hjá Manchester United er tað 4. fjepparafelagið hjá einum felagi í ensku Premier League. Hini trý, sum hava fjepparafeløg, eru Liverpool, Arsenal og Newcastle.
