Tað hevur gingið av skriðuni hjá Norðoya Sparikassa hesi seinastu bæði árini. Aftur í fjør mátti leiðslan staðfesta hall upp á 46,2 milliónir krónur fyri skatt Mynd: Kjartan Madsen
Aftur í fjør mátti triðstørsti peningastovnurin í landinum staðfesta eitt hall. Í fjør var hallið 46,2 milliónir krónur fyri skatt. Tað hevur við sær, at Norðoya Sparikassi seinastu tvey árini hevur mist 110 milliónir krónur fyri skatt
Aftur í fjør gekk av skriðuni hjá Norðoya Sparikassa. Í eina tíð hevur ljóðað, at sparikassin hevði hall í 2009, og í tíðindaskrivi í dag staðfesta nevnd og leiðsla, at lokali peningastovnurin hjá norðoyingum aftur í fjør hevði dundrandi hall. Úrslitið fyri árið ljóðar upp á -46,2 milliónir krónur fyri skatt í 2009. Í 2008 hevði Norðoya Sparikassi eisini hall, upp á 63,2 milliónir krónur fyri skatt, og tað merkir at hesi seinastu tvey árini hevur Norðoya Sparikassi mist slakar 110 milliónir krónur. Sambært tíðindaskrivinum er høvuðsorsøkin til halli øktar niðurskrivingar av útlánum. - Sparikassin hevur í 2009 staðfest eina versnandi gongd hjá fleiri kundum, ið hevur ført við sær øktar niðurskrivingar móti tapi uppá útlán og íløgum, verður sagt í tíðindaskrivinum. Samlaðu niðurskrivingarnar hjá Norðoya Sparikassa í fjør vóru upp á 45,4 milliónir krónur, og tað er á leið tað sama, sum tær vóru í 2008, tá tær vóru 45,1 milliónir krónur. Tað vil siga, at hesi bæði seinastu tvey árini eru umleið 90 milliónir krónur settar av móti tapi. Tað eru eisini aðrar orsøkir til, at úrslitið í fjør gjørdist so vánaligt. Norðoya Sparikassi er við í bankapakka I, og tað hevur kostað 12 milliónir krónur í fjør. Eisini fekk sparikassin samanlagt minni inn í rentu- og kostnaðarinntøkum í fjør. Sambært tíðindaskrivinum minkaðu hesar inntøkur við góðum níggju milliónum krónum samanborið við árið fyri.
