Siðbundin løg útsett til kvinnurøddir

2016-08-02 15:18 Author image
Dimma

TÍVILS DØTUR er heiti á fløgu, ið bólkurin Kata gav út tann 27. juli á forlagnum Tutl. Tívils døtur er eisini heitið á einum av teimum 12 sangunum, ið eru á fløguni. Sangarar í bólkinum Kata eru: Guðrið Hansdóttir, Arnfríð Lützen, Eyð Berghamar Jacobsen, Greta Bech og Unn Paturson.

Á nýggju útgávuni hevur Kata arbeitt við føroyskum, aldargomlum sangum, útsettir fyri kvinnurøddir. Sangirnir á fløguni fevna breitt innihaldsliga – úr tí heldur lætta, skjaldrasliga og skemtiliga, og søgur úr ævintýrkendum heimum, til frásagnir um dramatiskar kvinnulagnur, og ein spøkilsisvísa. Dømi um sangir á fløguni eru skjaldrið Rura, rura barnið, vísan um Silvurlín, og kvæðið um Grím á Miðalnesi.

Hetta er sangbaserað tónleikaútgáva, ið inniheldur gamlar laglinjur úr føroyskum fólkasangum. Kata byrjaði at arbeiða við hesum løgum í 2013. Arbeiðið tekur útgangsstøðið í bókunum hjá Marionnu Clausen (1947‐2014), har hon skrivaði niður á nótar siðbundin føroysk løg, sum hon fann á gomlum upptøkum.

Kórútsetingarnar hava hava Unn Paturson og Greta Bech gjørt. Útsetingarnar fyri røddir eru gjørdar út frá laglinjum, sum føroyskir sangarar hava sungið inn á band frá 1902 til í dag. Á fleiri av løgunum eru slagverk við Rógva á Rógvu, og elektroniskar effektir við Lasse Thorning Jæger.

Upptøkurnar gjørdi Rógvi á Rógvu í Ólavskirkjuni í Kirkjubø í 9.‐11. august 2015. Finnur Hansen hevur ljóðblandað, og Óli Poulsen hevur mastrað. Húsan hevur Uni Árting gjørt, og Finnur Justinussen hevur tikið myndir. Í húsanum greiðir Tóta Árnadóttir frá um sangirnar. Unn Paturson hevur framleitt.

placeholder

Meira langlesnaður