Meiri makrelur í ár í mun til í fjør

2016-07-28 10:00 Author image
Sigmund Vang

Tróndur í Gøtu er júst liðugur við kanningar av uppsjóvarfiski í føroyskum øki. Fyribilsúrslitini vísa, at nøgdin av makreli er størri í ár enn í fjør. Eisini meira sild varð fingin í føroyskum øki í ár. Veiðan av makreli og sild pr. ½ tíma vísti, at mesti makrelurin stóð norðanfyri og í ein landnyrðing úr Føroyum, og á Íslandsrygginum, meðan sildin var eystan fyri oyggjarnar og í ein útnyrðing móti Íslandi. Fyrivarni skal tó takast fyri, at kanningarøkið ikki er tað sama sum í fjør. Endaligu úrslitini verða tøk, eftir at øll skipini eru liðug við kanningarnar um hálvan august.

Tað skrivar Jan Arge Jacobsen, havfrøðingur hjá Havstovuni, á heimasíðuni Hav.fo.

- Nógvur smáur svartkjaftur stóð spjaddur um alt kanningarøkið. Hetta er fyri tað mesta tvey og trý ára gamal óbúgvin svartkjaftur, umleið 22-24 cm til longdar og vigar knapt 85 g í miðal. Kanningin er skipað sum altjóða felagskanning undir ICES, har Føroyar luttaka saman við Noregi, Íslandi og Grønlandi. Samlaða nøgdin av makreli, sild og svartkjafti, har tølini frá øllum rannsóknarskipunum verða við, verður roknað á fundi í Bergen um miðjan august, verður sagt.


Kelda: Havstovan

 

placeholder

Meira langlesnaður