33 leikarar á pall við nýskrivaðum sangleiki

Søgnin um kongsdóttirna í Nólsoy livir so leingi, sum fólk fortelja hana. Hvørt mansbarn í Nólsoy kennir søgnina uttanat, men nú verður hon sett á pall, sum sangleikur. Ovastevnuskráin í ár er rúgvismikil, men aftrat hesum verður gamla flakavirkið umskapað til sjónleikarhús

(Mynd: Rógvi Rasmussen)
Tíðindaskriv
10. august 2022 kl. 10:10

Leikurin tekur støði í søgnini um kongsdóttrina, sum kom úr Skotlandi til Føroyar og búsettist í Nólsoy. Hetta er ein sangleikur fyri stór og smá. Spælt verður á gamla flakavirkinum, sum í løtuni er umskapað til eitt serligt leikhús. Uppsetingin er eitt samstarv millum ovastevnunevndina, bygdafelagið og stigtakararnar.

Royndi leikritahøvundin Gunvor Reynberg, sum er hálvur føroyingur, fekk litið upp í hendir at skriva leikrit til ein sangleik, við útgangsstøði í kendu søguni um skotsku kongsdótrina í Nólsoy. Nólsoyingar hava síðani gjørt restina.

Gunnvør og Hilmar Joensen hava týtt handritið til føroyskt og kendi tónleikarin Kim Hansen hevur skrivað tónleikin. Súni Joensen hevur ljóssniðgivið og Nicolaj Falck hevur staðið fyri pallsniðgevingini.

Gunnvør Joensen hevur leikstjórnað.

Umframt hetta búgva flestu leikarnir í Nólsoy ella hava tilknýti til bygdina. Beinta Ingeborg Greve hevur leiklutin sum kongsdóttir og Magnus Reinert Gásadal er rossadrongur, unnusti hennara.

Tó at Nólsoy er gomul sjónleikarabygd, eru nú nøkur ár síðani, at leikarar í bygdini hava verið á palli. Tí gleða fólk seg almikið til ovastevnu, at sleppa at síggja leikin.

Frumsýningin verður hósdagin 11. august klokkan 17.

Sýningar vera annars hesar:
Fríggjadagin 12. august klokkan 17
Leygardagin 13. august klokkan 12:30 og 16
Sunnudagin 14. august klokkan 18