Hóast landsfundur Fólkafloksins verður leygardagin, so er tað longu í kvøld, at tunga avgerðin í flokkinum skuldi takast, tá løgtingsfólk, landsstýrisfólk, og tvey umboð fyri hvørt økisfelag í Fólkaflokkinum skuldu gera av, hvør verður næsti formaður flokksins.
Fundurin var fyri afturlatnum hurðum, men nú er greitt, at valið er fallið á Christian Andreasen, sum skal leiða Fólkaflokkin fram á leið.
Sambært VP.fo, so fekk Christian Fríbjart Andreasen 15 atkvøður, meðan Beinir Johannesen fekk 12 atkvøður av teimum tilsamans 27 atkvøðunum.
Sum Dimmalætting skrivaði fyrr í vikuni, so stóð valið ímillum Beinir Johannesen og Christian Andreasen.
Les meira: Skulu helst velja ímillum Beinir og Christian
Christian Andreasen var av nógvum roknaður sum favorittur í dystinum um valdið, sum atkvøðugreiðslan á Dimma.fo eisini bar brá av.
Christian Andreasen, sum er millum virknastu løgfrøðingum í landinum, er tingbólkaformaður og tí “de facto” hevur verið næstformaður floksins skal nú, sum nýggjur formaður floksins, hjálpa flokkinum á føtur aftur, eftir at flokkurin mestsum hevur gingið í tveimum vengrum – tí liberala og konservativa vonginum, har tað nú verður stóra uppgávan hjá nýggja formanninum at byggja brýr millum liberala og konservativa vongin í flokkinum.
