Norrøna fekk ein sjáldsaman gest á vitjan, tá skipið sigldi í donskum sjógvi í vikuskiftinum. Soleiðis skrivar Smyril Line á sínum Facebook-vanga:
– Móður og kaldur, hevði hesin vakri grýtissmyrilin funnið sær eitt gott pláss at kroka umborð á Norrönu í vikuskiftinum.
– Onkur vildi vera við, at hann kanska kendi seg sjálvan aftur á skorsteininum, skrivar Smyril Line.
Grýtissmyril ella Tornfalkur (frøðiheiti - Falco tinnunculus) líkist nógv smyrli, men kennist frá honum av tí, at hann er meira reyðbrúnur omaná og hevur longri vel.
Hann kann hanga stillur í luftini, meðan hann flaksar við veingjunum. Grýtissmyril byggir sær ikki reiður sjálvur, men tekur reiður, sum aðrir fuglar eru farnir frá. Sjáldan gevur hann seg eftir fuglum; mest etur hann mýs og ormar.
Grýtissmyril livir í Afrika, Asia og í stórum parti av Evropa. Serliga nógv sæst til fuglin í Suðursvøríki. Grýtissmyril er sjáldan sæddur í Føroyum.