Nú verða viðurskiftini hjá teimum, sum eru í Fiskavirkisskipanini hjá Als, broytt. Í løtuni eru 128 fólk í Als, men harafturat eru 552 fólk í fiskavirkisskipanini.

Í fiskavirkisskipanini eri tey, sum arbeiða í fiskivinnuni á landi, tryggjað, at tey fáa løn í minst 32 tímar um vikuna.

Sum støðan hevur verið, kunnu fáa útgjald úr fiskavirkisskipanini í átta vikur, so fara tey í Als. Arbeiða tey ein tíma hesar átta vikurnar, verður tíðin longd átta vikur afturat.

Men talan hevur verið um, at stytta hetta tíðarskeiðið, so at tey bara kunnu vera í fiskavirkisskipanini í fýra vikur. Fáa tey ikk minst 16 tímar á virkinum hesar fýra vikurnar, verða tey mett sum arbeiðsleys á fiskavirkinum og fáa sostatt ikki longur útgjald úr fiskavirkisskipanini, men fara í Als.

Tað er eitt samt ALS stýri, sum hevur mælt landsstýrinum til at fremja hesar broytingarnar, og landsstýriskvinnan í arbeiðsmarknaðarmálum, Ingilín Didriksen Strøm, hevur nú sett broytingarnar í gildi.

Eitt úrslit av hesum er, at tey, ið eru í fiskavirkisskipanini koma skjótari í vanligu arbeiðsloysisskipanina.  Í vanligu arbeiðsloysisskipanini verður arbeiðsloysisstuðul goldin fyri 40 tímar um vikuna, men tað verður goldið fyri 32 tímar um vikuna í fiskavirkisskipanini. 

Hetta er sostatt ein bati fyri tann arbeiðsleysa, tí útgjaldið verður hægri, sigur landsstýriskvinnan. Í vanligu arbeiðsloysisskipanini ber eisini til at bjóða fólki annað starv. 

– Í hesum tíðum, tá ið nógvir arbeiðsgevarar mangla arbeiðsmegi, verður hetta sostatt ein fyrimunur fyri fólk, tí nú kunnu tey skjótari fara í onnur størv. tá ið arbeiðsloysið er á fiskavirkjunum.

Hinvegin hevur metingin eisini verið, at tað er skeivt at binda fólk til eitt arbeiðspláss, har tað er ov lítið av arbeiði, samstundis sum at onnur arbeiðspláss mangla arbeiðsmegi.