Tíðindafundur hevur júst verið í Vilnius, eftir at Litava og Føroyar leiktu javnt á LFF-leikvøllinum í litaviska høvuðsstaðnum.
Teir lokalu miðlarnir vildu hava at vita, hvat fyri leikætlan føroyingar høvdu lagt fyri dagin, tí liðið trýsti høgt til tíðir.
– Vit royndu at trýsta litavar høgt uppi, tí fullu vit langt aftur á vøllin, so vita vit, at litavar kunnu spæla sítt skjóta smáspæl, og tað ynsktu vit ikki, sigur Håkan Ericson.
Håkan fýltist eitt sindur á dømingina í fyrra hálvleiki, tí alt ov ofta gjørdu litavisku verjuleikararnir rættiliga hørð fríspørk móti føroysku leikarunum, men uttan at kort vórðu givin fyri brotsgerðirnar á vøllinum.
– Dómarin loyvdi hart spæl í fyrra hálvleiki, sum nervaði okkara spæl nakað, men í seinna hálvleiki dømdi dómarin betur, men tá spældu vit ikki eins væl sum í fyrra hálvleiki, sigur landsliðsvenjarin.
Håkan greiðir frá fyri miðlunum, at føroyska liðið var komið her til Vilnius fyri at fáa eitt gott úrslit, og tað megnaði liðið eisini.
– Eg eri errin av mínum spælarum. Føroyingar kunnu eisini vera errin, tí við úrslitinum í kvøld er greitt, at vit eisini kunnu spæla í hesari deildini til komandi Nations League-kapping, sigur Håkan Ericson, landsliðsvenjari.
Liðið kemur seint til gistingarhúsið í kvøld, men skal tíðliga avstað heim til Føroya í morgin árini, men tá mann hevur fingið úrslitið, sum mann kom eftir, so ger tað kanska einki, at svøvnurin ikki verður tann nógvi í nátt.
.png){kind=logo}
