Hann er útihýstur frá Facebook, Instagram og Twitter, men tað steðgar ikki fyrrverandi amerikanska forsetanum Donald Trump at náa út til fólk via sosialar miðlar. Hann gongur ístaðin egnar vegir og arbeiðir enn við at seta ein nýggja sosialan pall á stovn, ið nevnist “Truth Social”. Og tað sær út til, at undirtøka er fyri nýggja sosiala miðlinum, tí íleggjarar hava nú sett eina milliard dollarar í nýggja pallin.
Tað skrivar Business Insider.
Í einari fráboðan skrivar Donald Trump, at hendan íløgan ger, at hansara felag – Trump Media & Technology Group Corp. – “stendur sterkari til at stríðast móti harðstýrið hjá Big Tech.”
Truth Social hevur sum endamál at skapa eina “opna, fría og ærliga globala samtalu”, upplýsir Truth Social, sum tó ikki upplýsir, nær vit kunnu vænta, at sosiali miðilin fer at virka.
Donald Trump er fleiri ferðir blivin ákærdur fyri at spreiða villleiðandi upplýsingar og óskjalprógvandi pástandir um valsvik, og bleiv eisini útihýstur frá Twitter, Facebook og Instagram, eftir at hansara viðhaldsfólk lupu á amerikonsku Kongressina á Capitol Hill í Washington, har hann millum annað hevði brúkt Twitter til at fáa sín boðskap út.
Facebook hevur eina uttanveltaða nevnd at hyggja upp á, um hann framhaldandi skal vera útihýstur, meðan Twitter hevur sagt, at hann ikki sleppur aftur á teirra sosiala miðil aftur.
.png){kind=logo}
