Minst 16 fólk eru deyð og 22 onnur eru særd, eftir at ein tyrla datt niður í dag beint við ein barnagarð í ukrainska býnum Brovary, ið er ein forstaður til høvuðsstaðin í Ukraina, Kiev.
Tað upplýsa fleiri altjóða tíðindastovur, millum annað Reuters.
Millum tey deyðu eru tann ukrainski innanríkisráðharrin, Denys Monastyrskyj, umframt fleiri onnur í ovastu leiðsluni í innanríkisráðnum.
– Í morgun, mikudagin 18. januar, datt ein tyrla hjá stjórnini niður. Millum tey deyðu er ovasta leiðslan í innanríkisráðnum, innanríkisráðharrin, varainnanríkisráðharrin og skrivarin í ríkisfyrisitingini, sigur løgregluovastin í Brovary, Ihor Klymenko, og leggur afturat, at tilsamans 16 fólk eru deyð – harímillum tvey børn. Níggju av teimum deyðu vóru við tyrluni.
– 22 fólk eru særd og fáa viðgerð á sjúkrahúsi, millum tey eru níggju børn, leggur Klymenko afturat.
Millum tey deyðu er ukrainski innanríkisráðharrin, Denys Monastyrskyj (Mynd: Sergei SUPINSKY/AFP)
Tað ber ikki til at siga, hvør orsøkin til vanlukkuna var.
Forsetin í Ukraina, Volodymyr Zelenskyj, sigur, at vanlukkan er ein syndarlig hending, og pínan er ikki til at halda út. Hann hevur givið landsins trygdarmyndugleikararnar í landinum boð um at kanna vanlukkuna og umstøðurnar kring vanlukkuna.
.png){kind=logo}
