Fyrst í mai mánað skipaðu næmingar í Tofta skúla fyri stuðulstiltakið fyri Ukraina, har millum annað ein stuðulsrenning upp á rennibreytini á Svangaskarði var á skránni.
Fleiri møguleikar vóru at stuðla átakinum, har allir næmingarnir runnu ella gingu í ein hálvan tíma. Rættiliga nógv valdu at lata pening, fyri at stuðla næmingunum, sum gingu ella runnu. Onnur komu við reiðum peningi.
Tað sæst at lesa á heimasíðuni hjá Nes kommunu.
Næmingaráðið í Tofta skúla skipaði eisini fyri fløskuinnsavnan umframt at 8. flokkur í skúlanum, eftir áheitan frá Nes kommunu, brúkti ein dag til at rudda á Svangaskarði, sum tey fingu eina samsýning fyri til frama fyri stuðulstiltakinum.
Nú, tá ið endaliga varð gjørt upp, hvussu nógv kom inn til stuðulsátakið ”Hjálp til Ukraina”, er greitt, at næmingar í Tofta skúla í alt hava samlað 63.024,50 krónur.
Í morgun var lítil samkoma í Tofta skúla, har kekkurin varð handaður til Reyða Kross. Tað var Jónas Thomsen, formaður í næmingaráðnum, sum gjørdi hetta vegna Tofta skúla.
Kristianna W. Poulsen, sum umboðaði Reyða Kross í morgun, takkaði hjartaliga fyri og minti á, hvussu stóran týdning tað hevur, at vit øll standa saman og vilja hjálpa í neyðstøðu, skrivar heimasíðan hjá Nes kommunu.
.png){kind=logo}
