Stóra tónleikakappingin Eurovision, sum ukrainski bólkurin, Kalush Orchestra, vann fyrr í ár, verður í komandi ár hildin í Bretlandi. Hesum hevur Eurovision boðað frá á heimasíðu teirra í dag.
Vanligt er, at landi, ið vinnur Eurovision skal vera verttjóð til komandi kapping, men Ukraina verður ikki karmur rundanum kappingina í næsta ár, av givnum orsøkum. Tað avgerðina tók European Broadcast Union (EBU), ið skipar fyri Eurovision, fyri einum mánað síðani.
Tað er bretski miðilin BBC, ið skal standa á odda fyri at framleiða Eurovision-sendingina. Samanlagt hevur BBC skipað fyri framleiðsluni átta ferðir.
Enn er óvist, hvør bretskur býur skal vera vertur. Frá í dag av kunnu bretskir býir søkja um at gerast vertir fyri stóru tónleikakappingini. Fleiri bretskir politikarar hava longu óalment boðað frá, at teir ynskja at fáa Eurovision til teirra bý.
.png){kind=logo}
