Mitt í øllum rokinum savnaðust vit á bókasavninum á Glasi til norðurlendska bókasavnsviku. Í ár var tekstabrotið úr íslendsku skaldsøguni Skuggabaldur eftir Sjón.
Ímillum kulissurnar, mikrofonirnar og hurlivasan funnu vit okkum eina lítla opna fløtu og sótu á gólvinum og lurtaðu eftir hugtakandi og inniliga tekstinum um prestin Baldur, sum var farin á revaveiðu.
Norðurlendsk bókasavnsvika er upplestrartiltak, tá somu bókmentir um sama evni verða lisnar upp samstundis um øll Norður- og Baltalond. Sama gera aðrir stovnar úti um heim, ið hava áhuga fyri Norðurlondum.
Endamálið við verkætlanini, ið Föreningarna Norden umsitur, er at breiða út kunnleika um norðurlendskar bókmentir og at virka fyri upplestri og at halda í hevd norðurlendska siðin at siga søgur.
