Eftir átta ár við róðrið hevur dugnaligi og framskygdi skúlaleiðarin í Lítlaskúla, Jenny Winther Poulsen, valt at geva leiðarastafettina víðari til varaleiðaran Gunvør Hofgaard. Tað var Jenny sjálv, sum saman við øðrum tók stig til at seta Lítlaskúla á stovn, og hon hevur seinastu átta árini gingið á odda fyri at menna hann til tann framúrskarandi skúlan, hann er í dag. Tó verður ikki sagt farvæl við Jenny, tí hon heldur fram sum lærari á skúlanum.
Gunvør tekur við sum leiðari frá 1. februar, meðan Katrin Bjarnadóttir, námsfrøðingur í forskúlanum í Lítlaskúla, tekur við sum varaleiðari.
Leiðaraskiftið varð sjálvandi hátíðarhildið. Børnini sungu tveir vakrar sangir fyri Jenny, og stýrisforkvinnan helt eina røðu. Eisini fingu Jenny, Gunvør og Katrin handað blómutyssi.
- Lítlaskúli takkar Jenny so hjartaliga fyri hennara megnararbeiði, og ynskir Gunvør og Katrini blíðan byr.
Lítliskúli er frískúli í Tórshavn, sum heldur til í gamla adventistaskúlanum á Hoyvíksvegi. Í skúlanum ganga børn frá forskúla til og við 6. flokk.
.png){kind=logo}
