Undirlagið á fótbóltsvøllinum á Argjum eigur nú tørn, og eftir ætlan skal undirlagið skiftast komandi summar.
Tað sigur Annfinn Brekkstein, formaður í mentamálanevndini.
Avgerðin er samtykt í mentamálanevndini og í fíggjarnevndini, og málið hevur ikki verið at venda í býráðnum, sigur Annfinn Brekkstein.
Graslíkið á Argjum er ikki skift síðan 2010, og Annfinn Brekkstein sigur, at tað var allatíð ætlanin, at fótbóltsvøllurin á Argjum eisini skuldi fáa nýtt undirlag.
Arbeiðið at veita nýtt graslíkið til vøllin á Argjum verður kortini ikki bjóðað út, tí avgerð er longu tikin um at fáa polytanvøll á Argjum, sum er sama tilfar, sum nú er lagt á allar tríggjar vallirnar í Gundadali.
Til spurningin, hví kommunan ikki bjóðar graslíkisarbeiðið út, sigur Annfinn Brekkstein, at tað var ynskiligt at fáa polytan lagt á vøllin, og at tey hava annars fylgt tilmælinum frá umsitingini um at gera eitt tilkeyp á sama grundarlagi.
- Tað er tað, vit ynskja og vilja, sigur Annfinn Brekkstein.
Tað er kortini ikki nágreiniliga avgjørt, nær farast skal undir at skifta graslíkið.
- Tað er ofta so, at vit samskifta við viðkomandi felag, sum brúkar vøllin mest, nær tað liggur best fyri. Eg minnist ikki heilt, um tað var apíl/mei ella mei/juni, men vit fara at gera okkara, fyri at alt verður klárt, og vit gera neyðugu tillagingarnar, soleiðis at vøllurin er brúkbarur.
Fær kommunan ein góðan prís frá Metatron, sum framleiðir polytan, nú ein fjórði vøllur eisini skal hava undirlagið?
- Tað er nakað, sum umsitingin skal kanna, sigur Annfinn Brekkstein.
.png){kind=logo}
