Hækkaðu orkuprísirnir kunnu trýsta brúkaraprísirnar uppeftir komandi tíðina. Sambært einari nýggjari greining hjá danska tjóðbankanum kann inflatiónin vaksa við umleið einum prosentstigi fyrsta árið, um oljuprísirnir halda fram á hesum høga støði.

Oljuprísurin hækkaði umleið 50 prosent eftir krígsútbrotið í Miðeystri, meðan gassprísirnir eru umleið 40 prosent hægri enn undan kreppuni. Tað hevur longu fingið orkukostnaðin at vaksa í fleiri londum.

Dýrari flutningur og matur

Tjóðbankin væntar, at príshækkingarnar fara at raka nógv breiðari enn bert orkuna. Serliga flutningur, matur og drykkjuvørur, bústaðarkostnaður og matstovuvinnan kunnu vænta hægri kostnaðarstøði. 

Hægri orkuprísir gera framleiðslu, upphiting og flutning dýrari, og tað kann enda hjá brúkaranum sum hægri prísir.

Ikki ein endurtøka av 2022

Tjóðbankin leggur dent á, at fleiri viðurskifti gera støðuna øðrvísi enn undir inflatiónskreppuni í 2022. Tá var inflatiónin longu á veg uppeftir, áðrenn orkukreppan rakti.

Harumframt er peningapolitikkurin neyvari og betri í dag, og harumframt er privata nýtslan minni. 

Kortini er óvissan stór. Um orkuprísirnir verða verandi høgir í longri tíð, kann vandin fyri nýggjum prístrýsti vaksa munandi.