Tað skuldi vera tað heilt stóra nýggja, men eftir nøkrum fáum tímum er alt dottið á gólvið.
Tað var í gjár at tað kom alment fram, at 12 stór evropeisk feløg høvdu gjørt av at skipa eina nýggja kapping, sum skuldi geva feløgunum nógvan pening.
Men beinanvegin byrjaði mótstøðan at koma undan kavi. Eitt nú legði UEFA-forsetin út við at hótta bæði feløg og leikarar við stongsli, og stutt eftir stuðlaði FIFA evropeisku fótbóltssamgonguni.
Í dag hevur millum annað bretski forsætisráðharrin, Boris Johnson, boðað frá, at hann umhugsaði eitt bann fyri Super League, og harumframt hava áskoðararnir hjá teimum ensku feløgunum verið øgiliga hvassorðað í sínum mótmælum.
Tað hevði fyrr í dag ta avleiðing, at fleiri feløg tóku frástøðu frá ætlanini. Tað hendi, tá bæði Manchester City, Chelsea, Atletico Madrid, Barcelona og Bayern München boðaðu frá, at tey ikki vera við í kappigini, og nú hevur eisini Manchester United sagt tað sama í einari sera fáorðaðari fráboðan á heimasíðu felagsins.
- Manchester United verður ikki við í europeisku Super League. Vit hava lurtað væl eftir reaktiónini frá áskoðarum okkara, eftir bretsku stjórnini og eftir øðrum aktørum. Vit fara framhaldandi at arbeiða saman við ørðum í fótbóltsamfelagnum fyri at koma til eina haldbara loysn til tær avbjóðingar, sum fótbólturin hevur, sigur felagið í fráboðanini.
Tað hevur verið nógvur røringur í fótbóltsheiminum í dag, og fyrr í dag ljóðaði, at tveir stórar í stórum feløgum høvdu sagt upp. Talan skuldi vera um stjóran í Juventus og Manchester United, og seinni í dag váttaði enska stórfelagið, at Ed Woodward fer úr starvi, tá hetta árið endar.
.png){kind=logo}
