Tveir nýggir kommunulæknar eru settir í starv. Talan er um Rúna Nolsøe og David Guðnason.
Rúni hevur seinasta árið arbeitt í Miðlon sum liður í serlæknaútbúgvingini. Hann hevur nomið sær embætisprógv í læknafrøði í august 2016, og fær væntandi serlæknagóðkenning í almennum medisini 28. februar 2023.
Rúni Nolsøe tekur við starvinum sum kommunulækni í Miðlon tann 1. mars 2023.
Suðuroyingar hava eisini fingið nýggjan kommunulækna. Heilsutrygd hevur nevniliga sett Davíð Guðnason í fast starv sum kommunulækna í Suðuroyar læknadømi og hann fer at arbeiða í læknamiðstøðini á Tvøroyri, har hann skal arbeiða fulla tíð.
Davíð Guðnason er upprunaliga úr Íslandi, men hevur búð í Føroyum seinastu mongu árini. Hann hevur konu úr Vági, og tók læknaprógv í 2014. Seinastu árini hevur hann arbeitt í læknahúsinum í Gundadali, har hann hevur gjørt seg lidnan við útbúgvingina sum kommunulækni.
Tað eru fýra kommunulæknastørv í Suðuroy. Tveir eru nú í føstum starvi, meðan hini bæði størvini verða røkt av skiftandi avloysarum.
.png){kind=logo}
