Fimm heiðurslønir vórðu lætnar, umframt Heiðursskjal Poul E. Petersen.
ÍtróttaNAVNIÐ 2022 er Hákun West á Teigum, ið hevur havt eitt framúr kappingar ár, bæði á føroyska hondbóltslandsliðnum og við felagi sínum Skanderborg í bestu donsku deildini. Evnaríkið Hoyvíksingurin hevur eisini nýliga, skriva undir sáttmála við eitt av teimum bestu liðunum í Týsklandi
Hini tilnevndu vóru Knút Lutzen og Kvinnuliðið hjá H71.
STJØRNUSKOTIÐ 2022 gjørdist Óli Mittún – hann vann greipuna fyri H71, spældi sínar fyrstu A-landsdystir og umboðaði Føroyar í bæði U18 og U20 EM-endaspølum.
Óli var kosin besti spælarin í U18 EM kappingini, og harafturat kom skrivaði hann undir sáttmála við svenska stórfelagið Savehof
Hini tilnevndu vóru Jónas Gunnleivsson Isaksen og Ragnheiður Ólafsdóttir Dam
FYRIMYNDIN 2022 er Jógvan K. Glerfoss í Bragdinum - hann brúkar sera stóran part av síni frítíð til ítróttin og venjingar, eins og hann setur seg inn í servenjingar av ymsum slag.
Hann leggur serliga nógva orku í tey ungu, sum við honum sum venjara røkka úrslitum, sum kunnumetast við tey í grannalondum okkara.
Saman við Jógvani vóru Róland Toftum og Hanna Erlingsdóttir Olsen, tilnevnd.
ÍtróttaÁTAKIÐ 2022 er Special Olympics fótbóltsliðið hjá HB.
Hvørja viku er skipað venjing fyri vaksin við menningartarni í HB. Talan er um átak, sum styrkir og víðkar felagsskapin, soleiðis at vaksin við menningartarni eisini eruvirkin partur av fótbóltsfamiljuni.
Í oktober vóru dreingirnir í smálandakapping í Liktinstein, og vunnu teir B-bólkin.
Í uppskoti til besta ítróttaátak vóru eisini “Heldur eitt ringhorn enn eitt gøtuhorn” hjá Tórshavn Boksing og Felagsliði hjá fimleikafelagnum Støkk.
ÍtróttaFELAGSSKAPURIN 2022 er Fótbóltsfelagið Víkingur – felagið hevur seinastu árini sett sær stór mál og satsað uppá egið tilfeingi. Eisini er stórur dentur lagdur á breiddina, har felagsskapurin verður dyrkaður. Hetta hevur við sær, at Víkingur er tað felagið, sum hevur flestar spælarar skrásettar samanborið við fólkatalið.
Í uppskoti til ÍtróttaFELAGSSKAPIN 2022 vóru eisini H71 og Royn.
Heiðursskjal Poul E. Petersen varð latið Hansinu á Plógv fyri sítt ótroyttiliga, sjálvbodna arbeiði fyri róðrarfelagið í Sandavági.
Í grundgevingini stóð m.a at Hansina hevur mong ár á baki í róðrardeildini í Sandavági. Bæði sum róðrarfólk, venjari, nevndarfólk og seinastu 35 árini sum forkvinna.
Og hóast hon er vorðin 70 ár, so er hon enn virkin í felagnum. So seint sum síðsta summar sat hon sum róðurskvinna á fleiri stevnum.
Ungdómsítróttur í smærri bygdunum kann vera trupul, tí tey ungu mangan leita sær av bygdini millum annað í lestrarørindum. Men Hansina hevur altíð lagt nógva orku í at gera róðrarumstøðurnar góðar sum møguligt, soleiðis at tey ungu framhaldandi tíma og vilja rógvingina.
Hon hevur verið við til at bygt neystið, og so hevur hon lagt nógva orku í at manna barnaróðrarbátarnar og framhaldandi stimbra og menna rógvararnar.
Endamálið við at lata heiðursskjal Poul E. Petersen er at heiðra eldsálir í føroyskum ítrótti, og fyri heiðurin fekk Hansina á Plógv gullnál ÍSF.
Allir vinnararnir fingu steyp, skreytblað og blómur. Hartil fingu tey, sum vunnu ÁTAKIÐ og FELAGSSKAPIN 15.000 kr í part.
NAVNIÐ, STJØRNUSKOTIÐ og FYRIMYNDIN fingu 5.000 kr í part.
Høvuðsstuðar hjá ÍtrottaFAGNAÐINUM vóru:
Poul Hansen, Tórshavnar Kommuna, Varðin Pelagic, Smyril Line, SMS og Atlantic Airways.