Tað er ikki altíð, at tað gongur av skriðuni, tá ið Landsverk stendur fyri byggiverkætlanum.

Síðan Landsverk fekk ábyrgdina av almennum verkætlanum í 2001, hevur stovnurin staðið fyri yvir 500 verkætlanum, sum tilsamans hava kostað yvir átta milliardir.

Sirið Stenberg, tingkvinna fyri Tjóðveldi, hevur spurt landsstýrismannin, sum umsitur Landsverk, Jacob Vestergaard, hvussu støðan hevur verið við almennum verkætlanum síðan 2015 til í fjør.

Landsstýrismaðurin sigur, at síðan 2015 hevur Landsverk staðið fyri 55 verkætlanum.

Men harumframt eru 15 størri verkætlanir, sum byrjaðu áðrenn 2015, og sum sostatt ikki eru við í yvirlitinum: eitt nú stórar verkætlanir sum viðareiðistunnilin, Glasir og H-bygningurin í landssjúkrahúsinum.

Jacob vesergaard sigur, at 40 av teimum 55 verkætlanunum, sum farið er undir síðan 2015, eru nú lidnar.

Fámjinstunnilin kostaði yvir 10 prosent meira enn ásett, men hinar 39 verkætlanirnar hava eitt frávik, sum er minni enn fimm prosent.

Og av teimum 39 verkætlanunum vóru 20, sum vóru bíligari enn væntað: eitt nú dalstunnilin, Miðnám á Kambsdali og Mýran, fyri at nevna nakrar av teimum stóru verkætlanunum.