Tann 1. juli búðu 55.505 fólk í Føroyum. Tað eru 643 fleiri enn fyri einum ári, og fólkavøksturin var sostatt 1,2 prosent.
Vøksturin er meira enn tvífalt so stórur sum í undanfarnu tólv mánaðunum. Eftir góð tvey ár við lítlum vøkstri er árligi fólkavøksturin aftur komin upp um eitt prosent.
Nettoflytingin vaks úr 82 upp í 466 fólk
Størsta broytingin sæst í flytingini til og úr Føroyum. Nettoflytingin vaks úr 82 fólkum í undanfarna tólv mánaða skeiði upp í 466 fólk seinasta árið.
Tilflytingin vaks, samstundis sum fráflytingin minkaði.
Burðaravlopið var 177 fólk. 632 børn vórðu fødd, meðan 455 fólk doyðu. Samanlagt góvu burðaravlopið og nettoflytingin ein fólkavøkstur á 643 fólk.
Samansetingin av fólkavøkstrinum er eisini broytt. Fólk við og uttan bústaðartilknýti standa nú fyri hvør sínari helvt av vøkstrinum. Í undanfarna tíðarskeiði stóðu fólk uttan bústaðartilknýti bert fyri umleið einum fjórðingi.
Aftur fólk í Múla eftir góð tólv ár
Størsti parturin av fólkavøkstrinum seinasta árið var í Tórshavnar kommunu. Fólkatalið vaks eisini nógv í Runavíkar, Sjóvar, Klaksvíkar og Nes kommunum og í Eysturkommunu.
Hinvegin minkaði fólkatalið mest í Tvøroyrar kommunu. Størsta minkingin har var á Tvøroyri og í Ørðavíkslíð.
Ein serlig broyting sæst í Múla. Tvey fólk fluttu hagar í juni, og sambært Landsfólkayvirlitinum er hetta fyrstu ferð í góð tólv ár, at fólk aftur eru skrásett at búgva í bygdini.
