Leygardagin kemur krimibókin, Lygn, út. Eyðun Klakstein hevur skrivað.
Bókaframløga verður í skúlanum á Skúlatrøð í Klaksvík leygardagin klokkan 17. Tá fer Solby A. Christiansdóttir at hava samrøðu við høvundin, Andrass Sólstein umrøðir bókina, og tónleikaframførsla verður við Hans Hjalta & Co. Kaffi og okkurt søtt verður at fáa. Eisini ber til at keypa bókina. Tiltakið er alment og ókeypis.
LYGN er spennandi og undirhaldandi føroysk krimi, sum eisini prikar føroyska samfelagið og rák í tíðin. Soleiðis verður sagt um bókina:
Dagin eftir, at beiggi Sáru Emmudóttur brádliga doyr, fær hon hondskrivað bræv við boðunum: »Hann gjørdi tað ikki«. Sára verður noydd at leita aftur í fortíðina, sum hon flýddi frá. Hon fer eftir pappeskjuni við gomlu myndunum, sum hon ongantíð aftur ætlaði at hyggja at. Slóðirnar leiða til rockkonsert í Havn fyri tjúgu árum síðani, tá ið ung kvinna doyði í eftirveitsluni.
Gallaríeigarin Jón Amos fær óvanliga uppgávu frá duldarfullum persóni. Hann verður biðin um at finna eitt sermerkt listaverk, sum eingin veit um. Knappliga verður lív hansara skakað av ræðuligari hending.
Sára Emmudóttir og Jón Amos mugu samstarva, tá ið ræðandi hendingar raka tey meint persónliga, og fyri at finna fram til sannleikan mugu tey avdúka eirindaleysar lygnir.
Bókin er 248 síður og fæst í bókabúðum kring landið leygardagin.
