Klokkan 9 fyrrapartin í gjár lætti U-21 landsliðið hjá monnum í fótbólti úr Vágum. Ferðast var umvegis París, og seint mánakvøldið var føroyska ferðalagið komið til Jerevan í Armenia. Flogferðin úr París og til Jerevan vardi millum fýra og fimm tímar.
Málið við ferðini er EM undankappingardystur ímóti Hvítarusslandi. Um alt var, sum tað plagdi at vera, so var føroyska ferðalagið ikki í armeniska høvuðsstaðnum, men heldur í Minsk, sum er høvuðsstaður í Hvítarusslandi ella onkrum øðrum býi í stóra landinum, sum er granni hjá Ukraina.
Men alt er ikki, sum tað plagdi at vera, og tí er tað í Jerevan, at føroyska U-21 landsliðið í dag fyrireikar seg til dystin ímóti Hvítarusslandi í morgin.
Armenia er í Kakasusfjøllunum – millum Svartahavið og Kaspiskahavið. Næsti granni vestanfyri er Turkaland, sunnanfyri er Iran, norðanfyri er Georgia og eystanfyri er Aserbadjan.
Í dag venur føroyska liðið á venjingarvølli, og í morgin verður vant á vøllinum, har EM dysturin verður hósdagin.
Tað vera eingir áskoðarar, og fyrsta bríksl verður klokkan 17.30 lokala tíð. Har er rættiliga heitt. Hitastigini liggja seinnapartarnar millum 35 – 37, so talan verður um stóra avbjóðing hjá føroyska liðnum. Tíðarmunurin er tríggjar tímar, og tað vil siga, at føroyska tíð verður fyrsta bríksl klokkan 14.30 hósdagin.
Hetta er fyrsta ferðin yvirhøvur, at Hvítarussland og Føroyar hittast í U-21 landsdysti.
Týsdagin 12. september fara Føroyar at spæla á heimavølli. Tá verður Kroatia gestur í Klaksvík.
Eyðun Klakstein er venjari, og Atli Gregersen er hjálparvenjari.
Føroysku spælararnir
Ari Petersen, 07 Vestur
Rasmus Nilsson, BK Frem (Danmark)
Áki Johannesen, B68 Toftir
Børge Petersen, KÍ Klaksvík
Elias Rusborg, Hvidovre IF (Danmark)
Signar á Brúnni, Víkingur
Bergur Poulsen, EB/Streymur
Ási Dam, 07 Vestur
Jákup Vilhelmsen, KÍ Klaksvík
Noah Hans Mneney, Bryne BK (Noreg)
Gullbrandur Øregaard, Sandnes ULF (Noreg)
Aron Jarnskor Ellingsgaard, Víkingur
Heini Fossdalsá Sørensen, FC Midtjylland (Danmark)
Jens Erik Bruhn, TB Tvøroyri
Jónas Warner, B71 Sandur
Áki Samuelsen, HB Tórshavn
Olaf Bárðarson, Víkingur
Jørgen Nielsen, B68 Toftir
Gutti Dahl-Olsen, EB/Streymur
Poul Kallsberg, Víkingur
