Helgi Dam Ziska fekk remis í dystinum móti Kroatia
Helgi fekk remis
Føroyar fingu eitt hálvt stig í dystinum móti krútsterka Kroatia í fjórða umfari á talvolympiaduni í India í dag. Tað var Helgi Dam Ziska, ið fekk remis móti Ivan Saric
Suni Merkistein/Talvssamband Føroya
1. august 2022 kl. 16:01
Tað var føroyski stórmeistarin, Helgi Dam Ziska, sum á 1. borði tryggjaði okkum eitt hálvt stig í dystinum.
Helgi hevði við hvíta fólkinum fult tamarhald á talvinum frá byrjan at enda móti sterkasta telvaranum í Kroatia seinnu árini, Ivan Saric, ið hevur gott og væl hundrað stig fleiri í styrkitali enn okkara stórmeistari. Eftir at hava flutt 55 leikir í góðar fýra tímar, endaði talvið javnt stutt fyri klokkan trý í dag.
Hinir á føroyska liðnum, Høgni Egilstoft Nielsen, John Rødgaard og Luitjen A. Apol, vórðu allir við undirlutan móti sterku mótstøðumonnunum. Kroatia er styrkismett nummar 17 av teimum 188 liðunum í kappingini.
Dysturin endaði tí 3½-½ til Kroatia.
.png){kind=logo}
