Italiumaður verður settur í heita sessin

Fyrrapartin bar bolt.fo tíðindini um, at HB skjótt fer at kunngera, hvør nýggi HB venjarin verður. Hetta var um sama mundið, sum danskur miðil sendi sama tippið til Miðlahúsið og undirstrikaði, at hetta var heilt sonn søga.

Og nú hevur HB boðað til tíðindafund klokkan 15 í dag. Sagt verður, at tá verður boðað frá nýggjum venjaratoymi.

Nýggi venjarin er Adolfo Sormani, sum er ættaður úr Italia. Hann er kendur venjari í Danmark, har hann eitt nú vandi Vejle BK 2017 – 2019. Tá var ein føroyskur spælari á lønarlistanum í Vejle. Tað er Viljormur Davidsen, sum nú er í HB, og sum Adolfo Sormani nú aftur verður venjari hjá.

Niðanfyri standandi yvirlit sigur, at tað er ógvuliga heitur sessur at sita í hjá tí, sum er HB venjari.

Ion Geolgau úr Rumenia var HB venjari í fimm ár. Hann tók við í 1998, tá ið hann og HB vunnu FM og steypafinaluna og harvið greipuna, og hann var venjari fram til í august 2002. 11. august tapti HB grannauppgerð ímóti B36 2-1, og so fór Ian Geolgau úr venjarasessinum. Árið eftir – í 2003 – var hann venjari í B36, og síðani fór hann av landinum.

Sum hjálagda yvirlit vísir, so hevur hurðin gingið títt í venjararúminum í HB, síðani Ion Geolgau fór úr sessinum. 20 ymiskir venjarar hava verið HB venjarar, og í níggju av árunum hava tað verið broytingar í venjarasessinum.

Síðsta broytingin var í apríl í ár, tá ið Jákup Martin Joensen avloysti Dalibor Savic. Jákup Martin og HB vunnu steypafinaluna og endaðu á triðja plássi í landskappingini, og nú er tað greitt, at Jákup Martin fer ikki at halda fram.

Í fjør var danski Kim Engstrøm venjari, men longu eftir 10. umfar varð hann loystur úr starvinum, og svenski Dalibor Savic loysti hann av.

Adolfo Sormani fór úr starvinum í Vejle í mars 2019. Hann segði sjálvur upp, søgdu fjølmiðlarnir, og so løgdu teir aftrat, at um hann ikki hevði havt sagt upp, so hevði hann verið uppsagdur.

Tá ið Adolfo Sormani var venjari í albanska felagnum FK Partizani varð hann sagdur úr starvi, tá ið tað á sumri í 2020 restaðu trý umfør av kappingini. Hetta var í koronutíðarskeiðnum, og orsøkin til uppsøgnina var tann, at hann noktaði at standa á odda fyri liðnum í dysti, har tað var greitt, at fimm spælarar vóru staðfestir at vera sjúkir av koronu.

Adolfo Sormani, sum er 58 ára gamal, hevur síðani verið venjari í Suðuritalia í USD Lavello, sum er felag í fjórði bestu italsku deildini. Har fór hann úr starvi 8. november í 2021, og nú setur hann seg í heita venjarasessin í HB.

Adolfo Sorman hevur UEFA Pro License, og higartil hevur hann verið 1,23 ár í miðal í venjarastørvunum, sum hann hevur røkt, ber til at lesa á transfermarkt.com.

kelda: faroesoccer.com