Higartil hevur hann bara umboðað barndómsfelagið TB og TB/FCS/Royn, tá ið feløgini í Suðuroy vóru felags á Suðuroyarliðnum, men nú hevur hann skift felag.
Talan er um Jens Erik Bruhn. 21 ára gamli vongverjin hevur skrivað undir uppá, at hann nú fer at spæla við EB/Streymi, vita tey í EB/Streymi at siga í dag.
Felagið hjá teimum í Sundalagnum skiftir millum at eiga heimavøll í Hólmanum á Eiði og við Margáir í Streymnesi. Í ár verður heimavøllurin við Margáir.
Í fjør var Jens Erik við í U-21 landsliðshópinum saman við eitt nú nýggju liðfeløgunum Mikkjali Hellisá og Bergi Poulsen.
Jens Erik hevur seinastu árini verið drúgvasti spælarin av øllum í TB. FaroeSoccer.com veit at siga, at hann í bestu deildini hevur spælt 90 landskappingardystir, 8 dystir um løgmanssteypið og 27 dystir í 1. deild.
