Julia Naomi spælir fyri 25. ferð á landsliðnum

Klokkan 18 í kvøld verður landsdystur á Tórsvølli. Talan er um Nations League kappingina hjá kvinnum, og tað er Kýpros, sum er gestur hjá føroyska liðnum.

Hetta er fjórði dystur í hesi kappingini, og higartil hava Føroyar tapt allar dystirnar við einum máli – 1-0 á heimavølli ímóti Montenegro og 1-0 á útivølli ímóti Kýpros og fríggjadagin endaði tað við 2-1 tapi ímóti Aserbadjan í Klaksvík.

Í kvøld fer Julian Naomi Mortensen, vongverjin í høgru, at umboða Føroyar fyri 25. ferð. Sambært faroesoccer.com var hon fyrstu ferð á landsliðnum 7. apríl í 2019, tá ið vinadystur á útivølli ímóti Litava endaði 2-2.

23 ára gamla Julia Naomi Mortensen hevur spælt við HB, men nú spælir hon við danska AaB.

Julia Naomi er 11. spælarin, sum røkkur 25 landsdystum. Dystarmetið eigur Heidi Sevdal, sum í kvøld fer at umboða føðilandið fyri 78. ferð. Tveir teir næstu spælararnir, sum fara at røkka 25 landsdystum, eru Birita Ryan og Jensa Tórolvadóttir. Tær fara í kvøld at spæla fyri 24. ferð á landsliðnum.