Norðoyastevnan hevur ofta verið lítið blíð við KÍ

Eftir at KÍ í Fuglafirði vann 12. sigurin á rað og harvið framvegis hevur fulla úrtøku, er spurningurin, hvørji sannlíkindini eru fyri, at KÍ fer at missa stig ella rættari, nær tað verður.

Næsti dystur hjá suverena toppliðnum, sum í 7-1 sigrinum í Fuglafirði saknaði fleiri, sum annars hava verið nógv millum teir fyrstu ellivu – eitt nú vongverjarnar Jóannes K. Danielsen og Patrick da Silva og Odmar Færø, sum tó varð skiftur inn í seinna hálvleiki – verður á norðoyastevnu.

Tað plagdi at vera tikið til, at KÍ og norðoyastevnan vóru einki serlig greipa. Hesaferð verður norðoyastevnudysturin ímóti AB, sum avrikaði væl í Gundadali, har tað tó endaði við 2-1 tapi ímóti B36. AB fer leygardagin til Klaksvíkar. Enn er ikki greitt, hvør verður nýggjur venjari á Argjum. Morten Overgaard er fyribilsvenjari, og hann hevur orsøk at vera nøgdur við avrikið hjá hansara monnum í Gundadali, hóast hann og AB spælararnir sjálvandi eru vónsviknir um, at tað ikki eydnaðist at vinna stig.

ÍF avrikið í 7-1 heimatapinum líktist ikki tí, sum fuglfirðingar vístu, tá ið teir vóru í Klaksvík og at enda taptu 1-0.

ÍF er uppflytari, og hin uppflytarin, TB, var í Sørvági, har tað endaði við 2-0 tapi. Sigurin ber við sær, at 07 Vestur nú er á fimta plássi. Merkisvert er tað, at TB nú spælir fimm dystir á rað á útivølli.

Tepri 2-1 B36 sigurin ímóti AB og trivaligi 6-1 HB sigurin ímóti EB/Streymi – báðir í Gundadali – bera við sær, at feløgini í Gundadali mest sum eru stavn um stavn í kappingini um plássið aftanfyri suverena toppliðið í Klaksvík.

EB/Streymur fær sunnudagin vitjan av TB, og tá verður talan um lyklauppgerð í kappingini um at sleppa undan niðurflytingarplássi.

B68 megnaði fyri aðru ferð í ár javnleik ímóti Víkingi. Hesaferð var tað í Sarpugerði.

ÍF – KÍ 1-7 (0-4)

0-1: Páll A. Klettskarð 8.

0-2: Deni Pavlovic 11.

0-3: Árni Frederiksberg 28.

0-4: Páll A. Klettskarð br 44.

1-4: Dánjal á Lakjuni 50.

1-5: Luc Kassi 56.

1-6: Jákup N. Vilhelmsen 75.

1-7: Páll A. Klettskarð 81.

Víkingur – B68 1-1 (1-1)

0-1: Hanus Højgaard 11.

1-1: Martin Klein Joensen 25.

07 Vestur – TB 2-0 (0-0)

1-0: Magnus Holm Jacobsen br 56.

2-0: Oddur í Haraldstovu Petersen 90.

HB – EB/Streymur 6-1 (4-0)

1-0: Áki D. Samuelsen 11.

2-0: Adrian Justinussen 13.

3-0: Jákup L. Thomsen 15.

4-0: Adrian Justinussen 34.

5-0: Dan í Soylu 57.

5-1: Niels Pauli Danielsen br 64.

6-1: Adrian Justinussen 86.

B36 – AB 2-1 (1-1)

1-0: Aron Knudsen 4.

1-1: Teitur Olsen 19.

2-1: Valerijs Sabala 71.

Leygardagin 3. juni

KÍ – AB: Jákup Øssursson Mohr

Sunnudagin 4. juni

EB/Streymur – TB: Petur Reinert kl. 15.00

ÍF – 07 Vestur: Rani A. Skaalum

B68 – HB: Eiler Rasmussen kl. 16.00

B36 – Víkingur: Rúni Gaardbo kl. 15.00