Donsk róðrarsøga varð skrivað nú á middegi, og ein føroyskur rógvari var við til at skriva søguna.
Fyri fyrstu ferð yvirhøvur eydnaðist tað danska 8-mannafarinum við kvinnum at kvalifisera seg at vera við í OL kapprógvingini. Sára Maria Johansen er partur av manningini, sum nú fer at fyrireika seg til OL kappingina, sum um ólavsøkumundið verður í París.
Sára Maria er ættað av Tvøroyri, og hon rør í kenda róðrarfelagnum KVIK í Keypmannahavn.
Fýra bátar kappaðust um tvey pláss í OL. Italia var greiður vinnari, og Danmark var næstfremst. Tað var í harðari kapping á 2000 metra teininum við Kina og Týskland.
Kappingin var í Luzern í Sveis, og Danmark, sum eigur stolta OL søgu í rógving, vann luttøku í fleiri OL kappingum.
Sára Maria hevur áður vunnið HM í inniróðri á 2000 metra teininum, og síðani tá hevur málið hjá henni verið at kvalifisera seg at vera við í OL kappróðri, og tað málið hevur hon í dag rokkið.
