Sjey fólk og felagsskapur í Havn fingu stuðul

Frá vinstru eru tað Ragnhildur Alda María Vilhjálmsdóttir, býráðslimur í Reykjavík, Lone Rosengreen Pedersen, býráðslimur í Nuuk, Annfinn Brekkstein, varaborgarstjóri í Tórshavnar kommunu, Avaaraq Olsen, borgarstjóri í Nuuk, Heiða Björg Hilmisdóttir, býráðslimur í Reykjavík, Justus Hansen, 1. varaborgarstjóri í Nuuk, Súna Mørk, býráðslimur í Tórshavnar býráð og Alexandra Briem, býráðslimur í Nuuk

Á fundi, sum hevur verið í Nuuk í Grønlandi, hevur grunnurin Nuuk-Reykjavík-Tórshavn býtt stuðul út til sjey umsóknir frá føroyskum umsøkjarum.

Tilsamans letur grunnurin á hvørjum ári 600.000 krónur í stuðuli, ella  200.000 krónur frá hvørjari limakommunu. Stuðulin fer til verkætlanir og tiltøk á mentanarliga økinum, og innan ítrótt og undirvísing.

Endamálið hjá grunninum er at styrkja samstarvið ímillum politikarar og fólki í teimum trimum høvuðsstøðunum, Tórshavn, Nuuk og Reykjavík. 

Tær sjey umsóknirnar úr Føroyum, sum fingu stuðul úr grunninum, fingu úr 15.000 upp í 40.000 krónur í stuðuli í part.

Størsta stuðulin fingu verkætlanin Heilsufótbóltur á Argjum og ein 8. flokkur í Eysturskúlanum, ið fingu 40.000 krónur í part.

Kvinnurnar, ið spæla heilsufótbólt á Argjum, skulu brúka stuðulin til eina ferð til Reykjavíkar at spæla fótbólt móti øðrum liðum, ið spæla heilsufótbólt. Og 8. flokkurin í Eysturskúlanum skal somuleiðis brúka stuðulin til eina ferð til Íslands.

Hini, ið fingu stuðul vóru:

Bramo “Music for Peace, Human Rights and Democracy” við Rógva á Rógvu

Havnar Bridgefelag til at vera við á Reykjavík Bridgefestival og Tórshavn Bridgefestival

Havnar Svimjifelag til at vera við í Reykjavík International Games

Ítróttarfelagið Hvirlan til at vera við í IR Stórmót í Reykjavík

Felagsskapurin, Glaðari tú, sum skal brúka stuðul til at fíggja eina ferð til ein felagsskap av sjósvimjarum í Nuuk.

 Næsti fundur í grunninum Nuuk-Reykjavík-Tórshavn verður í Tórshavnar í mai í 2024.