Tað gongur friðarliga fyri seg

So hava flestu liðini spælt sjey dystir. Tað vil siga, at tey hava avgreitt ein triðing av kappingini, sum fevnir um 21 umfør. Tveir dystir eru útsettir. Teir eru HB – Víkingur, sum er settur at vera 9. august, og B36 – TB/FCS/Royn. Hann var ásettur at vera 13. mai, men er útsettur. Enn er ikki greitt, nær hann verður spældur.

Í dag var KÍ, sum framvegis hevur fulla úrtøku, í Suðuroy, og favorittarnir fóru av Eiðinum í Vági við 3-0 sigri. Merkisvert var tað, at heimaliðið helt tørn, inntil síðsta minutt í fyrra hálvleiki. Tá var tað Lóa Samuelsen, sum setti hol á. Sambært faroesoccer.com var hetta 27. dysturin hjá henni í bestu deildini, og í dag var vongverjin fyri fyrstu ferð málskjútti í bestu deildini. Málini í seinna hálvleiki skoraðu Rebekka Benbakoura og Eyðvør Klakstein.

B36 helt við 2-0 sigri ímóti Víkingi í Sarpugerði tørn um triðja plássið. Bæði málini vórðu skorað í fyrra hálvleiki, og málskjúttar vóru Jacoba Langgaard og Barbara Høgnesen. Kristi himmalferðardag var Víkingur í Suðuroy, og tá eydnaðist tað at hava 2-1 sigur við til hús aftur. Tá skoraði 15 ára gamla Eydna Olsen Dalheim bæði málini hjá Víkingi. Hetta vóru fyrstu málini, sum hon hevur skorað í bestu deildini. Leona Djurhuus, sum týsdagin fylti 15 ár, javnaði stutt undan steðginum til 1-1. Hetta var fyrsta málið hjá TB/FCS/Royn verjuspælaranum í bestu deildini.

Hjá EBS/Skála gongur tað striltið. Í dag var samansetta liðið í Gundadali, har HB vann 5-0. Merkisvert var tað, at tvey tey fyrstu málini, sum vórðu skorað fyrra partin av fyrra hálvleiki, vóru sjálvmál. Elin Maria Isaksen økti stutt undan steðginum um munin til 3-0, og í seinna hálvleiki skoraðu Lea Johannesen og Sarita Maria Mittfoss. Hetta var fyrsta málið í bestu deildini hjá Saritu Mittfoss síðani 18. juni í fjør, og Lea Johannesen skoraði fyri triðju ferð í ár.

TB/FCS/Royn – Víkingu 1-2 (1-1)

0-1: Eydna Olsen Dalheim 23.

1-1: Leona Djurhuus 40.

1-2: Eydna Olsen Dalheim 69.

Víkingur – B36 0-2 (0-2)

0-1: Jacoba Langgaard 21.

0-2: Barbara Høgnesen 37.

HB – EBS/Skála 5-0 (3-0)

1-0: sjálvmál 13.

2-0: sjálvmál 22.

3-0: Elin Maria Isaksen 45.

4-0: Lea Johannesen 46.

5-0: Sarita Mittfoss 59.

TB/FCS/Royn – KÍ 0-3 (0-1)

0-1: Lóa Samuelsen 45.

0-2: Rebekka Benbakoura 61.

0-3: Eyðvør Klakstein 76.

Hósdagin 25. mai

KÍ – EBS/Skála

NSÍ – B36

HB – 07 Vestur

Leygardagin 27. mai

Víkingur – TB/FCS/Royn