Tað er nógvur vindur, og veðurstovurnar siga, at vindurin næstu tímarnar fer at vaksa.
Sambært DMI verður vindurin hvassur fram til klokkan 7 í morgin. Fram til tá verður roknað við fleiri enn 37 metrum um sekundið í hvirlunum. Hann er útsynningur í ættini.
Føroyska veðurstovan segði við Dag og viku í kvøld, at ein kuldabrúgv nú er yvir Føroyum, og tá ið hon er farin framvið, fer vindurin at minka.
Sambært heimasíðuni hjá Strandferðsluni er ferðslan á bæði sjógvi og landi rakt og seinkað og avlýst. Fyrrapartin og fram ímóti middegi í morgin fer vindurin at minka, og tá fara bussarnir aftur at koyra. Hvussu tað verður við ferðaskipunum er eitt sindur ymiskt frá einari rutu og til eina aðra.
Fyrrapartin í morgin verður tað fitt av avfalli. Hitin verður umleið 4 stig, og tað verður væl av avfalli fyrrapartin.
Flogferðslan er eisini tarnað av illveðrinum. Tvey flogfør fóru úr Føroyum í dag. Flogfarið til Gran Canaria fór avstað klokkan 7.38 í morgun, og flogfarið til Keypmannahavnar fór úr Vágum klokkan 13.03. Tvey flogfør vóru ætlað at lenda í Vágum í dag, men tey eru bæði avlýst. Annað – tað úr Gran Canaria – var ætlað at lenda klokkan 19.05 – og hitt – tað úr Keypmannahavn – var ætlað at lenda klokkan 19.20.
Tað verður ætlað, at flogfarið úr Gran Canaria fer at lenda klokkan 14.00, og at flogfarið úr Keypmannahavn fer at lenda klokkan 11.10 í morgin.
Í morgin fara annars trý flogfør úr Føroyum – tvey til Keypmannahavnar og eitt til Oslo – og trý flogfør eru sett at lenda í Føroyum, umframt tey bæði ið eru útsett frá í dag. Eitt er sett at koma úr Oslo og tvey úr Keypmannahavn.
.png){kind=logo}
