Ongin ivi hevur í nógv ár verið um, at SÍ hevur eitt avbera gott ungdsómsarbeiði í flogbólti, og at nógvir gávuríkir ungir leikarar koma úr Sørvági og úr Vágum.
Ein av teimum avbera stóru talentunum, sum føroyskur flogbóltur og sørvingar eiga, er Anna Katrina í Haraldstovu.
Anna Katrina og hinar genturnar úr SÍ vunnu í dag greiðan sigur á KÍF, og eru harvið vinnarar av Bónuskappingini 2024 fyri gentur 12. Væntast kann, at føroyski flogbóltsheimurin fer at hoyra munandi meira um Onnu Katrinu.
KÍF liðið, sum í dag tapti ímóti SÍ, er í stóran mun skapt av eini eldsál og mammu, Iris Johnsson, sum fyri fáum árum síðani byrjaði at arbeiða sum venjari við einum sera lítlum árgangi í Kollafirði.
Í ár megnaði hon at fáa hesar genturnar til finalurnar í Bónus steypakappingini.
Dagsins leikari í dystinum gjørdist ikki óvæntað Anna Katrina í Haraldstovu.
