Tað verður tann parturin, sum fyrst vinnur tríggjar finalur, ið verður FM vinnari í manshondbólti. Í dag var fyrsta finalan í høllini í Vestmanna, og hana vann VÍF. Úrslitið og gongdin kundi bent á, at tað vera fleiri enn tríggjar finalur.
Úrslitið í dag var 30 - 26 eftir hálvleiksstøðuna 14 - 11.
Hoyvíkingar vóru ikki so stinnir í verjuni í dag, sum teir hava verið í landskappingini higartil í ár, og í álopsspælinum var talan um ov nógvar villur. At tað ikki gekk so væl í verjupartinum bar við sær, at H71 skifti nógv út í miðverjuni, og tað kendist at vera darvandi, at tað vóru so nógvar skiftingar.
-Tað er týdningarmikið at vinna fyrsta dystin, og nú gleða vit okkum til mikukvøldið at spæla í Hoyvík, sigur Filip Jojic við Asbjørn Nattestad á midlar.fo. Filip var toppskjútti hjá VÍF við 12 málum, og tað kom illa við hjá VÍF, tá ið Filip ikki var á vøllinum fyrstu løtuna eftir steðgin. Hesa løtuna vendi H71 støðuni frá at vera 14 – 11 eftir fyrra hálvleik og til 16 – 15 H71 leiðslu, tá ið seinni hálvleikur var 12 minuttir gamal:
-Tað var neyðugt at seyma, tí síðst í fyrra hálvleiki fekk eg eitt hol dygst við annað eyga. Tíbetur bar til til at fáa aftur á vøllin, greiðir Filip Jojic frá.
Peter Krogh hjá H71 ásannar, at hetta var ikki gott avrik hjá hansara monnum:
-At VÍF skoraði 30 mál sigur, at vit vóru ikki nóg góðir í verjuni. Vit taptu ov nógvar mann ímóti manni støðum, og at vit í álopsspælinum gjørdu ov nógv mistøk bar við sær, at teir fleiri ferðir skoraðu í skjótum mótálopum, sigur Peter Krogh, sum saman við Boga Hansen við sjey málum var toppskjútti hjá H71.
Onnur FM finalan verður mikukvøldið 10. mai í Hoyvík. Triðja finalan verður í Vestmanna um eina viku, og um tað verður neyðugt við fjórðu og fimtu finalum, so vera tær 17. og 20. mai.
VÍF – H71 30 – 26 (14 – 11)
VÍF: Filip Jojic 12, Halluar Arason 8, Sjúrður Olsen 5, Andrias Eriksen 2, Kristian Jensen 2,
Hans Christophersen 1
H71: Peter Krogh 7, Bogi Hansen 7, Rói Seyer Hjaltason 4, Rói Ellefsen á Skipagøtu 3, Rókur Ziskason 2, Rúni Vest Højgaard 1, Sakir T. Frýdal 1, Niklas H. Hanusarson 1
.png){kind=logo}
