Ísraelskt loftálop rakti í dag, mikudag eina løgreglustøð í Gaza býi. Sambært palestinskum heilsumyndugleikum lótu níggju fólk lív.

Sambært AP vóru átta av teimum deyðu løgreglufólk, meðan tann níggjundi var ein 13 ára gomul genta. Reuters hevur eisini staðfest, at ein av teimum deyðu, var løgreglumaður.

Ísraelski herurin sigur, at álopið var rættað móti Hamas-fólkum á løgreglustøðini. Løgreglan er partur av Hamas-stýrdu umsitingini.

Tað er tí greitt, at løgreglufólk og í minsta lagi ein sivilur persónur, ein 13 ára gomul genta, lótu lív.

Enn ikki er váttað, um nakrir av teimum deyðu eisini vóru Hamas-kríggjarar.