Tvøroyrar kommuna hevði eitt fíggjarliga sterkt ár í 2025. Skattainntøkurnar vuksu við 8,2 milliónum krónum, og tøki peningurin vaks úr 9,1 milliónum krónum upp í 19,3 milliónir krónur. Samstundis samtykti býráðið einmælt ársroknskapin á býráðsfundi 10. juni.
Samlaðu skattainntøkurnar vóru 111,9 milliónir krónur. Tað svarar til ein vøkstur upp á góð átta prosent samanborið við 2024. Kommunuskatturin gav 78,2 milliónir krónur, skattur av eftirlønarinngjøldum 25,6 milliónir krónur, og felagsskatturin gav 3,5 milliónir krónur.
Rakstrar-, løgu- og lánsúrslitið endaði við einum halli upp á 410.000 krónur. Tað var tó munandi betri enn væntað í fíggjarætlanini fyri árið.
Tøki peningurin meira enn tvífaldaður
Fíggjarstøðan hjá kommununi styrktist munandi í árinum. Við árslok vóru samlaðu ognirnar 28,3 milliónir krónur, meðan tøki peningurin var vaksin til 19,3 milliónir krónur. Árið fyri var hann 9,1 milliónir krónur.
Kommunan tók samstundis upp lán fyri 14,5 milliónir krónur í sambandi við íløgur. Somuleiðis vórðu 3,4 milliónir krónur afturgoldnar av verandi lánum. Langfreistaða skuldin var 57,1 milliónir krónur við árslok. Kortini svaraði nettoskuldin bert til 33 prosent av eini álíkning, sum er væl undir skuldarmarkinum hjá kommunum.
Yvir 20 milliónir krónur lagdar í íløgur
Kommunan nýtti 20,2 milliónir krónur til íløgur í 2025. Størstu íløgurnar vóru gjørdar í fastognir, vegakervið, fólkaskúlaøkið og havnaøkið.
Millum størstu einstøku íløgurnar vóru arbeiði á kommunalum bygningum og fastognum fyri 6,3 milliónir krónur, vegagerð og vegaviðlíkahald fyri 3,8 milliónir krónur, dagføringar á fólkaskúlaøkinum fyri 3,3 milliónir krónur og arbeiði á havnaøkinum fyri 2,1 milliónir krónur.
Grannskoðarin hevur góðkent ársroknskapin og staðfest, at hann gevur eina rættvísandi mynd av fíggjarligu støðuni hjá kommununi. Sambært býráðnum vísir úrslitið eina sunna og haldføra fíggjarstøðu, sum gevur eitt gott grundarlag undir víðari menning av kommununi.
