Danir eru millum teir evropearar, sum skjótast hava mist álitið á USA sum trygdarligan sameinda. Samstundis eru danir millum tey í Evropa, sum mest stuðla einari meira sjálvstøðugari evropeiskari verju.
Tað vísir ein nýggj og umfatandi kanning frá European Council on Foreign Relations (ECFR), sum byggir á svar frá 19.481 fólkum í 15 evropeiskum londum.
Ein vaksandi partur av dønum heldur nú, at USA er ein kappingarneyti ella mótpartur heldur enn ein veruligur sameindi. Í øllum teimum kannaðu londunum er tað bert 11 prosent sum meta USA sum ein sameinda, meðan helvtin metir USA vera ein neyðugan samstarvspart.
Danir vilja hava sterkari evropeiska verju
Kanningin vísir eisini, at danir eru millum teirra, sum mest av øllum stuðla hægri verjuútreiðslum, størri evropeiskari vápnaframleiðslu og felags evropeiskari lántøku til verjuendamál.
Samstundis halda flestu evropearar, eisini danir, at onnur evropeisk lond heldur enn USA fara at koma teimum til hjálpar, um teirra egna land verður álopið.
Kortini ynskja flestu ikki at skifta Nato út við eina reint evropeiska verjuskipan. Heldur vóna tey, at sambandið við USA fer at batna aftur, tá forsetatíðin hjá Donald Trump er av.
Norðurlond venda sær frá russiskari orku
Í Svøríki og Finlandi sæst sama gongd. Fólk vilja hava størri evropeiskt sjálvbjargni á verjuøkinum og minni treytir av USA.
Samstundis er greiður meiriluti í nærum øllum londunum í kanningini ímóti at taka uppaftur innflutning av russiskari olju og gassi, hóast orkuprísirnir eru høgir. Í staðin vilja evropearar raðfesta varandi orkukeldur og orku, sum verður framleidd í Evropa.
Kanningin vísir eisini, at stuðulin til Ukraina framvegis er stórur. Men evropearar eru meira ivasamir, tá talan er um ukrainskan ES-limaskap undir verandi umstøðum ella um at senda egnar hermenn til Ukraina eftir eitt møguligt friðaruppskot.
Sambært ECFR eru boðini frá evropeiskum veljarum greið: Evropa má gerast sterkari og meira sjálvbjargið, men uttan at venda USA bakið.
