Vága kommuna hevur latið upp fyri umsóknum um innivist í Íverksetarahúsinum í Haraldsstovu í Sandavági. Har eru fimm arbeiðspláss til íverksetarar og fyritøkur, sum eru á hugskots-, stovningar- ella menningarstigi.

Endamálið er at skapa eitt livandi arbeiðs- og menningarumhvørvi, har íverksetarar kunnu arbeiða, hittast, býta vitan sínámillum og fáa vegleiðing til at menna hugskot síni.

Fast arbeiðspláss kostar 1.000 krónur

Tey, sum fáa innivist, fáa fast arbeiðspláss og atgongd til internet, printara, fundarhøli, felagskøk, postadressu og aðrar felags hentleikar.

Eitt fast arbeiðspláss kostar 1.000 krónur (DKK 1.000) um mánaðin. Eisini ber til at nýta arbeiðspláss í styttri tíð. Ein dagur kostar 300 krónur (DKK 300), og eitt klippikort til tíggju dagar kostar 750 krónur (DKK 750). Lesandi kunnu nýta arbeiðsplássini ókeypis.

Opið hús leygardagin

Øll, sum hava eitt vinnuligt hugskot ella fáast við íverksetan, kunnu søkja. Umsóknirnar verða mettar við støði í endamálinum við húsinum og eftir fakligum og praktiskum viðurskiftum. Tær verða viðgjørdar leypandi.

Leygardagin verður opið hús í Haraldsstovuhandlinum í sambandi við, at kommunan hevur latið upp fyri umsóknum um innivist í íverksetarahúsinum.