Innflutningurin til Føroya vaks munandi frá juli 2025 til juni 2026. Tilsamans vórðu vørur innfluttar fyri knappar 11,8 milliardir krónur. Tað eru góðar 1,2 milliardir krónur meira enn uppgerðarárið frammanundan, svarandi til ein vøkstur á 11,8 prosentum.

Serliga nógv vaks innflutningurin úr Íslandi. Av londunum uttan fyri ES vaks innflutningurin úr Íslandi mest – við 278 milliónum krónum.

Matvørur toga innflutningin upp

Innflutningsvirðið vaks í øllum høvuðsvørubólkum uttan í bólkinum ídnaðarvørur flokkaðar eftir ráevni.

Innflutningurin av matvørum og livandi djórum vaks úr 2,33 milliardum upp í 2,71 milliardir krónur. Tað er ein vøkstur á 374 milliónir krónur, ella 16 prosent.

Innflutningsvirðið á djóra- og plantuoljum vaks samstundis 49,2 prosent, úr 326,6 milliónum upp í 487,3 milliónir krónur. Sambært Hagstovu Føroya stavar vøksturin fyri tað mesta frá rapsolju.

Maskinur, skip og akfør vaksa mest í krónum

Størsti vøksturin í krónum var í bólkinum maskinur, motorar, skip og akfør. Innflutningsvirðið vaks 556 milliónir krónur, ella 22,5 prosent, og kom upp á góðar 3 milliardir krónur.

Innflutningurin úr ES vaks samstundis knappar 275 milliónir krónur, meðan innflutningurin úr øðrum evropeiskum londum vaks góðar 312 milliónir krónur.