Hørð mótstøða frá altjóða fótbóltssambondum, hevur fingið FIFA at gevast við ætlanini um at selja part av handilsligu rættindunum til HM-kappingarnar.

Ætlanin var at stovna felagið FIFA Forward Enterprise, sum skuldi umsita handilsligu rættindini til HM hjá monnum, HM hjá kvinnum og HM fyri feløg.

Síðani skuldu umleið 20 prosent av felagnum seljast til privatar íleggjarar. Virðið á felagnum var mett at vera um 20 milliardir amerikanskar dollarar.

Gianni Infantino, forseti í FIFA, segði, at ætlanin skuldi geva FIFA størri fíggjarligar møguleikar at menna fótbólt kring heimin og býta meira stuðul út til limalondini.

Men UEFA gjørdi greitt, at heimsmeistarakappingin ikki eigur at gerast ein handilsvøra hjá privatum íleggjarum. Eisini CONCACAF og AFC funnust at, at tey ikki vóru ráðførd um ætlanina, og málið skapti eisini ósemju innanhýsis í FIFA.

Sambært altjóða miðlum hevði amerikanski íleggingargrunnurin Thrive Eternal víst verkætlanini áhuga. Men eftir vaksandi trýsti hevur FIFA nú valt at gevast við ætlanini.

Gianni Infantino segði fríggjadagin, at FIFA hevði lurtað eftir sjónarmiðunum hjá limunum, og at samanhaldið í altjóða fótbólti hevur størri týdning, enn ætlanin um at selja part av rættindunum.