Trýstið á donsku stjórnina veksur, eftir at Venstre nú tekur undir við ynskinum hjá formanni Dansk Folkeparti, Morten Messerschmidt, um at kalla Fólkatingið saman í skundi til eitt orðaskifti um migratiónsstøðuna í Evropa.

Samstundis hevur forsætisráðharrin, Mette Frederiksen, sagt, at ES eigur at umhugsa at seta Spania uttan fyri Schengen-samstarvið, um landið ikki fær tamarhald á støðuni í Ceuta.

Kortini hevur stjórnin ikki tikið undir við ynskinum um at kalla Fólkatingið saman.

Utlendingapolitiski talsmaðurin hjá Venstre, Morten Dahlin, sigur við TV 2, at flokkurin stuðlar uppskotinum, men vil hava, at kjakið serliga snýr seg um Spania og Ceuta.

– Vit stuðla uppskotinum um ein skundisliga fyrispurningarkjak, men vit halda, at kjakið eigur at snúgva seg meira um Spania og Ceuta.

Vit mugu finna eina loysn, so Evropa ikki verður yvirtikið av migrantum úr Afrika og Miðeystri, og har vit ongantíð aftur fara at síggja eina støðu, har danskir motorvegir gerast migratiónsleiðir, skrivar Morten Dahlin.

Danmarksdemokraterne hava eisini boðað frá, at flokkurin stuðlar uppskotinum.

Við stuðlinum frá Venstre hevur Messerschmidt nú stuðul frá 44 fólkatingslimum. Tað krevur stuðul frá minst 72 limum at kalla Fólkatingið saman í skundi.