Føroyar fingu óvanliga stóran ans uttanlands á ólavsøku í ár. Kongshjúnini, Fólkatingið, politiskir flokkar, kommunur og fleiri sendistovur sendu føroyska fólkinum almennar heilsanir.
Ávaring frá donskum politikara
Men mitt í øllum fagnaðinum brúkti danski fólkatingsmaðurin Rasmus Jarlov ólavsøkuna til eina greiða ávaring. Eftir hansara tykki kunnu Føroyar ikki gerast sjálvstøðugar og samstundis vænta, at Danmark heldur fram at røkja føroyskar uppgávur.
– Antin er man partur av Danmark, ella er man ikki. Man kann ikki standa við øðrum beininum uttan fyri dyrnar og vera til reiðar at fara, um tað verður lagaligt, skrivaði Rasmus Jarlov.
Órealistiskt hugskot
Hann segði seg vera stúrin um tað, sum hann nevndi „sera órealistisk føroysk hugskot“ um eitt sjálvstøðugt føroyskt ríki, har Danmark framvegis skuldi røkja eitt nú verju, uttanríkistænastu, sendistovur, gjaldoyrapolitikk, fongsulsmál og loftferðslu.
– Um Føroyar lýsa seg sum sjálvstøðugt land, heldur Danmark sjálvandi ikki fram at reka partar av hesum tá fremmanda landi, skrivaði hann.
Samstundis rósti hann Føroyum sum einum „ótrúliga vælvirkandi samfelagi“.
Kongshjúnini: Nógv ferðast heim á ólavsøku
Danska kongshúsið legði í síni heilsan dent á felagsskapin og sterka sambandið millum føroyingar heima og uttanlands.
– Vit vita, hvussu stóran týdning ólavsøkan hevur – at familjur og vinfólk savnast, og at nógv ferðast heim at halda ólavsøkuna, skrivaðu kongshjúnini.
– Vit ynskja øllum nakrar sera góðar dagar, hvar tit so halda teir.
Heilsanin varð løgd út bæði á donskum og føroyskum. Myndirnar vóru frá vitjanini hjá kongshjúnunum í Føroyum í juni 2025.
Heilsa frá Fólkatinginum
Við Christiansborg veittraði Merkið lið um lið við Dannebrog. Fólkatingið skrivaði:
– Í dag er tjóðardagur Føroya, og Fólkatingið flaggar við føroyska flagginum, Merkinum, undir liðini á Dannebrog. Góða ólavsøku.
Eisini flokkarnir Venstre og Moderaterne sendu stuttar heilsanir. Venstre ynskti øllum føroyingum tillukku við tjóðardegnum, meðan Moderaterne skrivaði á føroyskum:
– Hjartaliga góða ólavsøku.
Greve kommuna og Koldinghus vóru millum almennu stovnarnar í Danmark, sum vundu Merkið á stong. Koldinghus lýsti ólavsøkuna sum eina søguríka hátíð við gudstænastu, skrúðgongu og setan av Løgtinginum.
– Tað er ein hátíðardagur fullur av søgu, felagsskapi og stoltleika, skrivaði Koldinghus.
Heilsanir úr Bretlandi, USA og Ísrael
Bretska sendistovan í Keypmannahavn sendi eina sjónbandsheilsan, har dentur varð lagdur á felags norðuratlantiska samleikan.
– Sum grannar í Norðuratlantshavi eru vit øll myndað av havinum. Felags áhugamál og virði eru grundarlagið undir sambandi okkara, segði sendistovan í heilsanini til føroysku vinir sínar.
USA ynskti góða ólavsøku
Danska sendistovan í USA greiddi amerikonskum fylgjarum frá Føroyum, kappróðri og ólavsøkuni. Hon skrivaði, at kappróður er tjóðarítróttur Føroya, og at ólavsøkan markar endan á róðrarárinum.
– Eitt føroyskt orðatak sigur, at føroyingar eru føddir við árum í hondunum, skrivaði sendistovan og vísti á, hvussu djúpt havið og sjómansskapurin eru rótfest í føroyskari søgu og gerandislívi.
Heilsa frá Ísrael
Ísraelska sendistovan í Danmark ynskti Føroyum ein tjóðardag „fullan av felagsskapi, siðvenjum og hátíðarhaldi“.
Sendistovan nevndi eisini, at Ziv Tal, sendiharri, fyrr í ár hevði vitjað Føroyar og hitt løgmannin, Beinir Johannesen.
– Vit senda okkara heitastu heilsanir og gleða okkum til framhaldandi at styrkja vinalagið millum Ísrael og Føroyar, skrivaði sendistovan.
Sjónvarpsmaðurin Jobbe Pilgaard, sum var á ólavsøku áttanda árið á rað, skrivaði, at hann ikki longur kundi ímynda sær ólavsøku uttan skerpikjøt og rabarbusnaps úr Stóru Dímun.
– Eg elski hetta landið fyri fólkið og mentanina – og fyri opið at bjóða okkum inn, skrivaði hann.
