Bert ein lítil partur av burturkastinum hjá Posta verður endurvunnin. Nýggja burðardygdarfrágreiðingin vísir, at Posta framleiddi 46,1 tons av burturkasti í 2025. Av hesum fóru 7,4 tons til endurvinningar, meðan 38,7 tons fóru til brenningar.

Tað merkir, at 16 prosent av burturkastinum vórðu endurvunnin, meðan 84 prosent endaðu í brenning.

Møguleikar fyri menning

Tølini vísa, at burturkast framvegis er eitt øki, har Posta hevur stóran menningarmøguleika.

Samanborið við 2024 er samlaða burturkastnøgdin minkað úr 49,7 tonsum niður í 46,1 tons. Samstundis er nøgdin, sum fór til endurvinningar, minkað úr 8,5 tonsum niður í 7,4 tons.

Í frágreiðingini verður víst á, at ein partur av burturkastinum stavar frá felags kantinuni á Óðinshædd, sum eisini verður nýtt í sambandi við útleigu og tiltøk.

Vil hava meira til endurvinningar

Posta sigur í frágreiðingini, at felagið sær møguleikar á hesum økinum og hevur sum mál at styrkja arbeiðið við skiljing av burturkasti.

Dentur verður lagdur á at økja lutfallið av burturkasti, sum verður sent til endurvinningar komandi árini.