Í ár eru 50 ár liðin, síðan Heimastýrið yvirtók postverkið úr donskum hondum og Postverk Føroya varð sett á stovn.

Posta bjóðar almenninginum til móttøku fríggjadagin 4. september í sambandi við, at 50 ár eru liðin, síðan Postverk Føroya varð sett á stovn.

Móttøkan verður í framleiðsluhølunum hjá Posta á Óðinshædd 2 frá klokkan 15 til 17. Á skránni verða røður og brellbitar, og Guðrið Hansdóttir fer at spæla.

Posta sigur, at felagið fegið vil hátíðarhalda dagin saman við teimum, sum gjøgnum árini hava verið partur av samstarvinum og søguni hjá føroyska postverkinum.

Føroyar yvirtóku postverkið í 1976

Heimastýrið yvirtók postverkið frá danska Post- og Telegrafvæsenet 1. apríl 1976. Nýggi stovnurin undir Landsstýrinum fekk navnið Postverk Føroya.

Yvirtøkan kom í kjalarvørrinum á samráðingum millum donsku stjórnina og Landsstýrið í 1975. Eitt veðrahorn varð valt sum búmerki hjá nýggja stovninum.

Frá Postverki Føroya til Posta

Í 2005 varð Postverk Føroya gjørt um til partafelag. Fýra ár seinni, í 2009, fekk felagið navnið Posta og nýtt búmerki. Landið eigur allan partapeningin.

Søgan um postflutning í Føroyum røkkur tó nógv longri aftur. Fyrsta føroyska posthúsið læt upp í Tórshavn 1. mars 1870.

Edvard Remberg, stjóri í Posta, bjóðar øllum hjartaliga vælkomnum til 50 ára hátíðarhaldið.