Ólavsøkan hevði í ár serligan týdning fyri Sjálvstýri. Tingmaður floksins, Sámal Petur í Grund, var aftur við í ólavsøkuskrúðgonguni, nú flokkurin aftur er umboðaður á Føroya Løgtingi.

Hann lýsti tað sum eina framúr góða kenslu. Sambært flokkinum var luttøkan ikki bara ein hátíðarlig løta, men eisini ein sjónlig staðfesting av, at Sjálvstýri aftur hevur fingið sæti og rødd á tingi.

Álitið krevur ábyrgd

Sjálvstýri vísir á, at politisk umboðan ongantíð kann takast fyri givið. Hon krevur áhaldni, trúfesti og álit frá veljarunum.

Flokkurin sigur seg vera takksaman fyri at vera aftur á tingi, men leggur samstundis dent á ábyrgdina, sum fylgir við sessinum.

– Nú ræður um at nýta sessin væl – til frama fyri fólkið, fólkaræðið og menningina av Føroyum sum sjálvstøðugari tjóð, sigur Sjálvstýri.