Tað er vanligt, at lærlingar fáa frádrátt í skattinum, eisini tá ið teir fara í barsil. Tað sigur Aksel V. Johannesen, landsstýrismaður í fíggjarmálum

Kristian Krog Hentze, tingmaður fyri Fólkaflokkin, hevur spurt hann, bvussu eru viðurskiftini við lærlingafrádrátti hjá lærlingum, tá teir eru í barnsburðarfarloyvi

Lærlingar fáa ein frádrátt, har teir kunnu draga 50.000 krónur frá lønini, áðrenn skattur verður roknaður. Fevnir lærutíðin bara um ein part av árinum, er frádrátturin eisini lutfalsligur.

Í fjør viðgjørdi Taks spurningin um, hvussu lærlingafrádrátturin skal viðgerast tá ið lærlingur fer í barsil og í tí sambandi varð eisini samskift við Yrkisdepilin.

Tá var niðurstøðan at tað, sum er avgerandi, er, um lærutíðin er galdandi ella ikki.

Fyri at lærlingur skal fáa frádrátt, skal hann hava lærusáttmála. Yrkisdepilin hevur upplýst, at tað er vanligt at lærupláss og lærlingur gera avtalu um at leingja lærutíðina.

Tá lærutíðin verður longd, er lærlingurin framhaldandi fevndur av lærusáttmálanum og tískil hevur hann eisini rætt til frádrátt í  barsilstíðini, sigur Aksel V. Johannesen.